المكونات :
250 جرام دقيق
1 ملعقة كبيرة خميرة
1 ملعقة كبيرة قرفة
ملح
بيضة
مية ورد
عسل ( أو سكر بودرة، قطع فاكهة صغيرة، شيكولاته)
سمسم ( أو مكسرات)
دقيق مخلوط بمية (كمية محدودة علشان هاتستخدم فى لزق العجين)
زيت

طريقة عمل رول مقرمش بالقرفة والعسل :
فى طبق غويط عندك تحطى الدقيق مع القرفة ، الخميرة ، والملح.
بعد كدة تكسرى عليهم البيضة، وفوقيهم شوية من مية الورد، وتعجنيهم مع بعض.
بعد كده فى طبق مدهون بالزيت ومتغطى، تاخدى من العجين وتعملى كور، وتاخدى واحدة واحدة وتحطيها فى الطبق وتغطيه تانى.
بعد ما تكوريهم كلهم، تاخدى واحدة واحدة وتفرديها زى الفطير كدة على رخامة المطبخ لغاية لما ترفع خالص. بس لازم تكون الرخامة مدهونة بالزيت برضه.
بعد كده تجيبى طاسة تيفال، وتسخنيها شوية، وتجيبى عجينة عجينة (بعد ماتفرديهم) وتحطيهم فى الطاسة ، وتسويهم بس اهم حاجة انهم ماينشفوش.
بعد ما تسويهم وتطلعيهم، تجيبى واحدة واحدة وتلفيها (رول)، وتقومى لازقاها من الطرف (كله بالطول) بالدقيق المخلوط بالمية اللى قلنا عليه فى المكونات فوق.
بعد كده تجيبى قلاية الزيت وتكونى ملياها زيت وتحطيها على النار، ولغاية ما الزيت يقدح تكونى قطعتى الرول اللى عملتيه ولزقتيه قطع صغيرة.
بعد ما تقطعيهم ويكون الزيت قدح كويس، وتقومى حطاهم يتقلوا.
بعد كدة تطلعيهم وترصيهم فى طبق، وترشى عليهم العسل، وبعد كده فوقيهم السمسم ورشة قرفة.بالهنا والشفا.